2019年5月28日 星期二

20年歷史的DAIWA LBCD絞20190528

我這個20年歷史的DAIWA LBCD絞因爛咗手柄冇用好耐,近來在老淘發現有這個古董Parts配,我的戰友又重生了,一於過幾日去夜釣,尋回昔日光輝吧!



丸九常温練餌20190528

今日去開荃灣,去咗威信睇吓有冇好野賣,去到第一眼已見到有箱丸九嘅常温練餌放咗喺度,我等咗呢隻貨好耐了,之前用雪藏黃色練餌都幾好用,大魚細魚都啱食,所以今次對常温練餌都有D信心,而且唔使雪,方便很多,因此我掃了幾包,老闆話剛剛到貨,話我是第一個買佢嘅客仔,佢重話下批貨唔知幾時返貨,因為丸九成日唔準時有貨,買定幾包唔使煩。



2019年5月25日 星期六

BlueFish工具盒20190525

今日行旺角海磯舍,見到有隻BlueFish出的工具盒幾正,呢隻盒以前有個大陸牌子出過,價錢超平,我曾買咗一個給R,佢話超好用,但之後再唔見有得賣,今日終於見到BlueFish有岀,價錢百零蚊個,雖然比以前那個貴,但以現在D工具盒比較,其價錢仍然是抵買,所以我同R都買咗一個,晏D我就執拾吓D小物工具到新盒,一於All in one!



2019年5月19日 星期日

叫做唔使龜20190519

今日同家姐、表弟及R去解毒,全日冇咩料到,但每人都有D魚仔中吓,叫做唔使龜吧!




2019年5月17日 星期五

同R去hea釣幾粒鐘20190517

今日下午同R去hea釣幾粒鐘,每人用1兩蟲,釣晒就算,是次玩水退,魚訊不多,但都有D魚中吓,唔使龜!







2019年5月16日 星期四

直絞配筏竿20190516

昨天筏釣特登冇用筏絞,轉了用直絞,因為我要玩磅頂,玩過之後我已愛上筏竿配直絞,出絲同收絲速度快,中大魚又唔使用人手放break,可專心同條大魚玩野,啱晒我嘅style,但上次用的直絞size大了些,所以今日出佐敦世界買咗隻細D嘅直絞去配支筏竿,期待下次筏釣更加得心應手吧!




2019年5月13日 星期一

狂中八爪魚,又中老虎20190513

今朝約咗三家姐及R一早搭早船去釣魚,另外大家姐遲一班船先到,我地去到立即開竿,趕住食到嗰轉流水,我是第一個中魚,是條沙鱲,跟住又中,之後狂中八爪魚,又中老虎,化咗我好多魚餌,不久R都中返D大連米,三家姐跟住中魚。而來釣魚嘅人越來越多,但流 水開始過去,沒太多魚訊,這時大家姐才到,她還帶埋小兒子來,只是服侍他已用了很多時間,到她釣魚時已沒有水流了,釣了一段時間,到收竿時才中條尾指油立。算係好過冇魚中吧!時機已過,齊齊收野返市區吃飯吧!










2019年5月5日 星期日

放生沙鱲仔20190505Video


R中條合格黑沙鱲20190505

本來今日唔好天取消去釣魚,但又被千人台騙了一鑊,立即同R擸架生去釣過,去到後一個人都冇,釣位任揀,是日魚訊不多,我首先中魚,之後再中,而R一直未有魚,我就放低支竿過去同R爹吓影吓相,但我每次咁做都好旺她的魚運,一做呢個動作就有魚中,R立即中條合格黑沙鱲。成朝龜氣盡消!玩咗3粒鐘後見天色不對便走人返市區食飯!一返到去立即下雨了,時間啱啱好,總括今日都算解毒成功吧!下週如好天再釣過。








2019年5月4日 星期六

去咗黃金及老鴨買拍片工具20190504

今日下午去咗黃金及老鴨買拍片工具,諗住明天釣魚用,㸃知天文台轉咗口風,話明天狂風暴雨!天氣先生也在潛水!他媽的難得放一日假又狂風暴雨,個天唔係咁玩我呀?!


GAMAKATSU防水釣魚褲腳放盡多1寸20190504

個幾月前穿咗條GAMAKATSU防水釣魚褲去釣魚,下着雨釣魚時其防水性能也不錯,但就係褲腳短咗D,於是今日放盡咗個褲腳多1寸,雖然不是很多,但已經足夠及好看很多了。


2019年5月1日 星期三

買咗個10000mah嘅尿袋來拍釣魚片20190501

今晚同R去咗行老銅世界,看看他們的特價假餌,但睇唔啱,之後行過入咗MINISO買咗個10000mah嘅尿袋,用來供電畀我部山狗action cam來拍釣魚片,以後唔使未中魚先冇電了。