2018年10月29日 星期一

R釣到新郵票20181029

今次用半日解毒,釣況麻麻,只是R釣到新郵票~唱歌婆是也!







2018年10月23日 星期二

收竿前R中條絲鱲20181023

今次用埋上次用剩D蟲去解毒,晨早坐船在途中食R煲的粟米魚肚羹做早餐,去到投第一口餌便發覺D魚走晒今次難釣了,原來流水沖來一海污糟水,覆蓋面積廣泛,我只中沙鑽及老虎各一條,R就比我好,除了一D連米之外,收竿前半粒鐘中條大大地的絲鱲,總括來講今次釣况不太理想,但都叫做唔使龜吧!









2018年10月22日 星期一

畀一半價錢就買到 PROVISOR 露指手套20181022

今晚行佐敦世界,見到Daiwa 啲 PROVISOR 露指手套十分正斗,於是用埋自己的會員積分去買,只畀一半價錢就買到了,真係幾抵吧。買完看看張單,佢又畀番十分我,下次又當十蚊用了!



2018年10月21日 星期日

中了隻腳板Size的八爪魚20181021

今日快閃解毒雖然唔使龜,但中魚次數也不多,唯一比較特别係我中了隻腳板Size的八爪魚吧,玩到中午水亦退晒便全無魚訊,於是唔等返漲便走人出市區食野吧了。今日小息時間飲咗R煲的花膠籮蔔鮮魚湯,非常好飲,多謝R!







2018年10月18日 星期四

破了自己的沙鑽記錄!20181018

今次落雨絲濕去解毒,拿拿淋攞番件Gore-tex來頂住,呢次都有D魚仔玩吓,但最頂癮就是其中一條食埋來啄幾吓又停咗,不過我都知佢古惑,我就把條蟲拉郁半尺,像受到攻擊而逃走似的,果然佢忍不住立即大啖食埋來,我見時機成熟,立刻抽竿,嘩!此時佢立即發癲,衝力之勁把我支Daiwa小繼萬能磯2-390拉到彎晒弓,連磅頂都出埋絲,我心諗咩料呀?頂咗幾吓出絲,條魚開始冇力,於是一抽一收絞佢上來,上水一看,原來是條24cm大沙鑽,破埋我自己嘅沙鑽記錄,真係飲得杯落了!







2018年10月13日 星期六

有D魚解吓毒!20181013

今日下午三㸃幾才去解毒,好彩都有D魚仔玩吓,而R釣到佢嘅新郵票,是條一尺長的海狼,佢話估唔到會中到呢D魚,覺得開心,之後釣到7㸃,天都黑齊,魚餌又釣晒,於是走人去食飯了。






2018年10月10日 星期三

愉快的一天20181010

今次去解毒又是愉快的一天,解完毒又是飲R煲D靚湯的時候,今次飲冬菇螺片瘦肉湯。







2018年10月7日 星期日

破壞環境的人會有報應! 20181007

好耐冇去老地方解毒,今朝一早去玩吓,水流漲盡返退,流水帶來許多垃圾,成日kick到垃圾,最多就係塑膠,這便是亂掉垃圾的人帶來的後果,我自問已做好本份不亂掉垃圾,但為什麼要我來承受這惡果!但我信做壞事破壞環境的人會有報應,在生不報、死後也必報。地獄大把地方等着他們,也不用填海加大地方吧!
全日只得R中一條連米,釣了三粒鐘,水退晒了,走人去食野算了。






2018年10月4日 星期四

新位有驚喜!20181004

今次同R去解毒,初時去新位試釣,全無生命跡象,玩咗大半粒鐘見唔對路,於是走咗去北面釣,終於都有返D魚訊,全日釣况都過得去。另外要讚吓R今次煲的鮮魚湯非常好飲,原來她特意看了D星級厨師的youtube偷了師,令今次D湯果然有料到,正!