2018年6月30日 星期六

泥鯭孫同池仔毛20180630

今日再去筏釣半天,全部都係泥鯭孫同池仔毛,相都冇影到就掉返落海,只係見到人哋有兩次起魚,一條係紅衫魚,另一條大約30cm的金頭鯛。基本上釣況都係好靜,釣到冇乜癮,廢事磨爛蓆了,早D出返市區食個下午茶,然後回家雪吓冷氣好過!




2018年6月28日 星期四

72歲的磯釣名人松田稔20180628

以前GAMAKATSU在香港有展覽我一定會去,還記得他們好鍾意揀9月做展覽,可能是近秋磯時份吧!而展覽中最高興的時刻梗係由磯釣名人松田稔教釣魚啦。教完釣魚就梗係與他來個合照吧,不經不覺這次合照已是11年前的事了,如再想見松田稔做show,睇怕都要親身去日本釣具展先見到他了!以今年72歲的他,真係令釣界fans擔心他會退休,不過也要面對現實吧,如果他退休前再來香港一次,那便是完美結局!





2018年6月27日 星期三

買咗支PM 出的短撈箕柄20180627

經過上次漁排見人中魚激鬥後,發覺都係唔好靠排上提供的撈箕好D,事關嗰D撈箕日久失修,畀人用到甩頭甩骨,真係中條大魚用來撈魚時先出事那便真的飲恨當場!所以昨晚去了漁家買咗支PM 出的短撈箕柄,百零蚊又幾靚仔,還可分兩個長度來用,平平地買個安心都幾好。


2018年6月24日 星期日

有D魚仔過吓手癮!20180624

昨晚在FB見到好多師兄師姐都話今日同我一樣去解毒,個個都求神拜佛望今日唔好落雨,就係集合咗咁多釣魚人嘅念力,今日果然冇落雨,而且是出猛太陽嗰隻,我連防曬都冇搽,咁就瀨咗野!今日同R在西貢買咗兩盒雪藏沙蝦去釣,總括來講都有D魚仔過吓手癮,但同船一起來的一位師兄真係魚運返晒來,開釣唔夠一粒鐘就中條起碼3斤的紅鮋,不久之後又中條食用裝的金頭鯛,聽佢講原來他龜咗成7個月咁耐,今次乜野好運都返晒來了,還聽到佢講D魚餌是用生蝦及爆丸來釣,爆丸我成日都聽見,但還是未用過,有機會真係要試吓先得!









2018年6月18日 星期一

完全解晒毒!20180618

早幾日前天文台又話今日行雷落雨,㸃知昨天又改囗風,我梗係立即去買魚餌等今日同R解毒啦,今日真係全日風和日麗,好天到爆!而且遇着生流大漲,真係中嘅魚種都多D。分別有沙鱲、扯旗鱲、黑梳欏、連米、沙鑽、黃釘、火㸃及三鬚!應真種類豐富,完全解晒毒!









2018年6月16日 星期六

兩條火㸃又一餐!20180616

見後兩天又話落雨,今日就一早同R釣返個早水,是日初三大流,早上大漲到橋躉都差㸃蓋過,有船經過D浪湧都炒晒上去,見到有師兄上去釣魚都十分狼狽。今次我又係中埋D放生級魚毛,而R繼續魚運當頭,中了兩條接近腳板size的火㸃。同場有位師兄認得我,同我打招呼,與他吹開水佢話夜晚已喺度釣,而且勁多蚊,聽說佢朋友中了幾條黃腳,但自己就一條都未中到,真係釣魚除了技術還要講魚運!釣到中午時份,我同R2個人3兩蟲便玩晒,於是執野走人,經過那位師兄度say good bye,他仍然好有恆心地作戰,祝願佢中返條大魚開齋啦!





2018年6月10日 星期日

又係扯旗鱲B嘅世界20180610

早嗰幾日打風落豪雨,過多一兩日又話狂風雷暴落成個星期雨,今日大好時機重唔去解毒還等何時!?今日釣況又係扯旗鱲B嘅世界,我D魚餌又係畀佢哋玩晒,但同上次一樣又係中隻大八爪魚,還比上週那隻更大,接近我隻鞋嘅size!而R小姐最近D魚運比我好,除了中那些搞搞震的扯旗鱲B之外還中了很多其他的魚種,喺呢度我唔出太多她的相,留返佢在自己的FB專頁post出來吧!









2018年6月3日 星期日

有隻大頭八爪魚想打劫我20180603

趁住今日有風好天氣,立即同表弟及R小姐去解吓毒,今次我的收穫麻麻,全日瘋狂地中埋D扯旗鱲BB,真係9成魚餌都係畀佢哋玩晒,唯一有㸃好玩的便是有次中扯旗鱲B時中途有隻大頭八爪魚想打劫我,鬥力之間被我勾中,即時被我逮捕,呢個故事教訓佢做D犯法嘅事要付出代價!而表弟及R就有魚運,給他們過足手癮,最開心就是R,中了好耐沒中的目標魚,黑沙鱲是也,雖然size不大,但㸃都係中咗,我都替她歡喜吧。