2017年7月29日 星期六

R中番條28cm黑沙20170729

見明天34度而晏D又下雨,提前今日釣番兩三個鐘下午水,是日死流,平時飛機流今日反而好好釣,R小姐的確好魚運,又畀佢中番條28cm黑沙,佢都話算係解咗毒,而我就得條手板沙立,叫做唔洗打龜吧!





2017年7月20日 星期四

釣番兩個鐘夜魚20170720

R小姐毒癮發作,叫我同佢放咗工都走去釣番兩個鐘夜魚,佢係夜鬼就冇問題,但我平時冇乜事都好早瞓,只是既然佢下了order就照去吧!整晚魚訊不多,流水亦快,自然中魚也不多,8點至10點中得幾條魚,相都冇乜點影,不過來釣魚既人都唔少,一班人走了,轉頭又有另一班人來釣,可惜唔係個個都有釣魚守則,有兩條友用投竿,求其投了出去就算,完全不理流水情況,個set魚絲被海流推到打橫掃晒我哋D釣位,根本我已釣唔到魚,佢自己又懵盛盛勾咗石又唔知,簡直害人害己,只是夜媽媽廢事同人嘈,見時間差不多,同R收野走人算了!



2017年7月15日 星期六

漁竿大平賣20170715

今日旺角海磯舍漁竿大平賣,價錢有D比正價更平成千銀,真係幾大咪執輸,R小姐叮屬我幫她霸番支DAIWA Megathis磯竿,我一入到去勁摷之下,一千零一支1.5号竿畀我拿到手,我問老板還有多一支1.5号嗎,佢話冇晒喇!咁我唯有唔要留番畀R小姐吧。呢支竿超抵呀,正價賣5萬日元,但佢現在賣港幣唔使2000元,你話係咪超荀價!之後去了佐敦世界,我就買咗支2-390小繼磯萬能竿,平就冇得平喇,只是呢支竿只有佢地有得賣,其實R小姐都有一支用緊,見佢火力幾好,咁就買支來用吓啦。



2017年7月9日 星期日

不用打龜20170709

天文台又話今日晴雨不定,等我只穿短衫短褲加一件後備雨衣,點知全日勁曬,唔使問梗係變咗脆皮乳豬啦!今日大流,30克鉛都定點唔到釣位,好彩沒多久便停流,但魚訊都有,可惜唔中勾,魚仔吧了!全日魚穫得幾條,叫做不用打龜吧,玩到3點走人去食tea雪吓冷氣降吓温先!




2017年7月2日 星期日

R小姐同大魚博鬥20170702

R小姐落order要我陪佢連釣兩日魚,今日時晴時雨,要等到下午兩三點先釣得,但今日我嘅釣魚心情只是一般,沒諗住造世界,反而R興致勃勃,一去到就立即開竿作戰,見她釣到兩條魚仔,我才hea住開竿,突然聽到R尖叫,望一望,支竿彎咗一半,但覺得她搞得掂,我就平常心去看看佢吧,但說時遲那時快,條魚開始爆發,看見R揸住支竿成個人向下踪,成支竿指晒落海,就來揸唔住支竿,我第一時間發現R個磅頂鎖死咗,立即衝去同佢鬆磅頂,但最後都來遲一步,條絲監生拉斷了,之後R綁勾時連手都震埋,你都咪話唔激動,我就同佢講,雖然上唔到條魚,但你都升咗班,有同大魚博鬥經驗,第日再中魚就識點做啦!經過呢一次之後,她的中毒程度又加深了!






2017年7月1日 星期六

釣回歸魚20170701

今日又同R小姐兩個人去釣回歸魚,是日死流,流水冇咩大變化,只是上午流左下午流右,照上次一樣打沉底,由於成朝有人玩浮潛,魚穫不多,我只中兩條三鬚,R就好好多,又三鬚、連米、牛鰍,梳欏,樣樣都有D。