發表文章

目前顯示的是 2017的文章

DAIWA鵝仔羽絨外衣20171230

圖片
2017年倒數日子,多謝R小姐送給我一件很好的禮物,這是一件DAIWA鵝仔羽絨外衣,顏色與款式我也很喜歡,而且十分啱身,開心得很了!


Shimano2018魚拓月曆20171225

圖片
今日同R小姐郊遊過聖誕,之後返到灣仔,梗係上去老聯行過轉啦,看到有D Shimano魚拓月曆一卷卷插晒喺度,我問老細係咪2018年的,跟住佢已經話送給我同R每人一卷了,多謝晒老細呢份聖誕禮物了。真係要祝佢生意興隆啊!






Kizakura黑魂BROS誘技浮波20171223

圖片
在旺角海磯舍見到隻Kizakura黑魂BROS誘技浮波齊晒號數,見價錢不太貴,就同R小姐每人掃幾粒,呢隻波自重適中,亦有唔錯的形狀,能見度高,諗住用作日常步兵地磯之用,廢事吓吓都用松田稔D貴野啦!


天寒地凍去解毒20171217

圖片
今日天寒地凍都陪R小姐釣番一個上午解毒,成朝魚訊不多,我唯一中一條瓜衫都上到岸也甩番落海,注定我今日打龜,R就有番D魚玩吓,叫做都給她過到手癮啦。另外多謝R知我實唔識帶熱野去飲,特別冲了一壷熱檸薑茶畀我飮,飲咗真係成個人暖晒!





三劍俠去出磯!20171210

圖片
今日三劍俠去出磯,天公造美,好天兼收了風,咩野位都上到,就係因為咁,所有磯釣人都出洞,大部份磯位也上滿人,重大鑊過父母親節飲茶揾位,最後我地上咗個新位,表弟開竿先,找到個荀位,我就要服侍R小姐,兩個都遲開竿,我度水時發現水底地形十分複雜,左中右深淺相差十幾廿尺,流水向右走,釣組跟流走,釣棚去到深水唔到底,去到淺水又掛底,玩埋全遊動也是惡搞,最後我同R小姐只中D雜魚,但表弟就好好多,在好位都中到好多雞魚,叫做一齊釣都唔使龜晒!













一兩蟲只中到幾條魚!20171203

圖片
今日釣魚天氣唔錯,但我沒有晨早出洞,去到成10點半先第一投,而一早就有師兄開了5支竿及放了幾個手牌地雷做世界,好彩還有位釣,今次D魚訊清晰,大魚訊息也很多,但十分精口,盜餌能力超强,今日買咗一兩蟲只中到幾條魚!隔離師兄見佢中兩次大魚,但兩條都係魔鬼魚,我亦拍了他起魚的威水片,希望呢位師兄唔好嬲我放佢D威水野畀人睇啦。同場加插R小姐整畀我食的蓮藕藥饍雞扒,非常入味,超好食,多謝R小姐!








給自己的生日禮物20171126

圖片
到新華買給自己的生日禮物,比正價平咗六舊幾水,還是秋冬新款磯鞋。



D魚變咗種唔吸粉只食蟲20171119

圖片
今朝天氣麻麻,推遲咗個幾鐘先出去解毒,今次每人兩半蟲打沉底,由於晏咗去,食唔正水漲時間,一路釣水一路退,但都中到D魚,反而見到人地打粉還好似冇料到,唔通D魚變咗種唔吸粉只食蟲?呢吓野真令人莫名其妙!





探吓兒島玲子小姐20171118

圖片
今日去咗老銅探吓兒島玲子小姐,冇見她咁耐,又曬黑咗唔少,跟手梗係同佢影番張相啦!同場我和R小姐都有獎抽,我就抽不中了,但R很好彩抽中咗,可是但揀一份獎品,佢就攞咗餅銀狼母線,嗰度都賣百五蚊架,叫做有D著數攞咁啦!


天氣麻麻落大雨20171112

圖片
今早水退很多,釣況不理想,期間我只中條黃腳,R小姐中瓜衫,有個呀叔打粉只中1條立仔,跟住水退盡冇晒料到!而且天氣麻麻,諗住大風加少少雨粉都殺啦,㸃知玩咗兩粒鐘就落大雨,又冇雨衣,石面又跣,最後都係收野走人。




Daiwa防曬長袖衫20171107

圖片
今晚同表弟行釣具店,佐敦行完又去旺角,發覺好多夏季防曬長袖衫都收起晒轉冬季,但我呢D特別釣魚人唔係幾怕凍嘛,一件夏季防曬長袖衫穿足四季的,如出礁磯釣穿埋件救生衣曬吓太陽直情會出汗添!好彩在旺角重見到我LIKE的Daiwa防曬長袖衫,雖然款式得兩隻色,但起碼還有我Size啦,試穿過見幾啱身又幾好睇,而且周圍都唔見有貨,於是便要咗佢吧。


魚毛放晒20171105

圖片
今日上午同R小姐去解毒,我玩打沉底,R玩浮波,上半場我有D魚仔玩吓,下半場輪到R中魚,今日叫做有得玩吓,好過上個月魚影都冇條,魚毛放晒,玩完去食Tea,算係解咗D毒了。







釣到條巨連米20171028

圖片
重陽節去釣魚,用了R小姐一支冇號數360小磯竿,1.25號子線,青蟲打沉底,很高興釣到條巨連米,由於冇帶撈箕只好硬抽上水,成支竿仔彎到不似魚竿,解鈎後條魚狂彈甩手,成條魚在大石上向海飛去,我為咗捉返佢搞到仆街雙腳跪在石上一手撳住條魚,咁都總算捉得返,但我膝頭就爆了缸,咁樣捉返條魚我唔煎咗佢來食就奇呀,好彩煎好條魚食落口確係零捨不同,鮮味無比而且更帶有一點蟹肉味,真係好食到爆!




釣魚毛!20171022

圖片
今日去釣返幾粒鐘,諗住初三應該流水唔錯啦,點知成個上午D流都唔係幾郁!搞到要釣魚毛,好彩天氣幾好,秋高氣爽,釣唔到魚都唔覺辛苦,希望下次會有返D魚釣吓啦。






Daiwa LBCD絞又可以重生了20171021

圖片
我呢個十幾廿年前嘅舊款Daiwa LBCD絞個手柄T字把手用到爛溶溶,所以冇用好多年了,但最近見到我D師兄把他同我一樣的絞換了個很美觀的波頭把手,心想我的絞有希望了,問了師兄他說是朋友幫他淘番來的,於是我又上網看看,但找了很久也找不到,好彩最後給我找到一間舖直情有得賣整隻手柄,而且價錢不貴,這比起買波頭回來DIY來得方便,不過我買這隻手柄也有風險,因為在網上沒有得試,全靠文字講出來吧,但100蚊人仔可買個希望而用得返千幾蚊個絞,搏一搏都值得嘅!
之後寄咗來了,立即換來試試看,一試之下Fit晒,之前心裡的風險一掃而空,呢個一絞三杯嘅古董又可以重生了。