發表文章

目前顯示的是 十一月, 2002的文章

浮游磯釣中得精口大黑沙!20021123

圖片
在生日前約埋表弟及老友去搞磯,是日4級風左右,同船有其他磯佬同我地一架艇,本來去唔同釣㸃,但我哋去到上磯時佢哋又跟埋上來爭位,未見過D咁冇品嘅釣魚人!由於地方細小,我幾大帶頭霸番個有利位置啦。唯一好位我哋霸咗,那幾條麻煩友西口西面咁去咗另一邊釣,太好了!唔使對住D冇品魚佬。

放好晒野立即set竿,開好誘餌度埋水深,打幾羹誘餌落海睇反應,之後正式作戰,是日魚訊不多,釣咗兩粒鐘眾人也冇乜料到,但我就不停化餌,初時以為水底魚毛唔上面,喺晒水底揾食,但奇怪的是每次食餌都是食了勾以外的半隻南極蝦,之後就唔食,如果魚毛化餌㸃會咁大嘥,一定化得乾乾淨淨啦,這個情況持續大半個鐘,之後我嘗試把魚勾改大,令到勾尾凸出的蝦減少,逼佢食勾。

終於浮波反應加大了,但沉波深度不多,而下沉速度很慢,浮番上來時看看魚勾中的南極蝦,發覺蝦身全都是牙印,這時我知有料到,但又要很耐心同佢周旋,因為這條魚應該身經百戰,如果畀佢走甩一口,一定全日都唔會返來食餌。

連續再同佢玩咗半粒鐘,終於捉到牠食餌的節奏,今次不容有失,浮波下沉第一次再浮上來,跟住再微沉,機會來了!我把魚竿向左打橫一抽,中了!中勾一刹那如勾石般實晒,1秒後條魚知道中伏,立即猛烈游走,成支魚竿彎晒落海,當時我是用Shimano Tidream1.2號磯竿,竿身比較硬,瀉力功能冇咁好,而我只用了1.5號子線,只好放LB就魚,但就魚即係讓魚,給了牠機會走埋礁石邊,萬一魚絲過石就大鑊了,我立即追埋過去把魚絲角度修正,最後條魚終於畀我制服了,撈上水一看是條大黑沙,魚勾緊緊勾中嘴唇邊,真係中得好險!全日收竿得我一個中魚,叫做上天提早給我一份生日禮物吧!